〔2011〕063. 題外話！… 講故事 ~ 1

YAHOO新平台，寫新BLOG時加入圖片咁麻煩，我有好多照片要上載，又怕而家立立亂，上載了照片遲下又要再排列過，所以我都無心機更新網誌住。
既然不能加圖片，就出住一篇沒有圖片的〝題外話〞，講下故事解下悶！

幾日前聽標講了一些本地人的處事作風，我告訴他：〝中國人說，凡事留一線，日後好相見，做人不要去得那麼盡，那些人不知道地球是圓的，當他們以為自己在帶頭時，卻不知道自己其實也是在別人之後。另一件是社署終止一個領綜援女士的援助金一事，這些事令我不期然想起一些往事，原本這往事已忘記了，但突然想起了之後一時間就沒法再放下，令我又再為此而心感不平！真討厭！要說出來，減減壓！

以下故事都是真人真事，為了我自保免被人秋後算帳，所以人物姓名欠奉！知道這些故事的人請高抬貴手，幫幫忙當故事看好了，不要揭人私隱！謝謝！而這裡是不設座位的，所以懇請大家不要嘗試〝對號入座〞，免生意外！謝謝！

故事都發生在N年前某區的政府部門中，我只是一個兼職合約員工，間中要回到寫字樓做些文件處理及安排工作。

1. 　　有一日，上司叫我到打字房問人攞兩張〝咩野紙〞（我已忘了那是有些特別的FORM 或紙，總之不是普通A4紙！），當時我初來步到，唔知頭唔知路，就照上司指示去到打字房敲門，然後開門，當時個打字員正與別人交談中沒理我，我等了一會才開口：〝唔該，可唔可以比兩張〝咩野紙〞我呀？〞個位女士只係停一停但望都無望我一眼，當聽唔到，繼續同人講野，於是我再說：〝唔好意思呀，係呀B先生叫我來攞2張〝咩野紙〞架！〞佢才轉個臉來，黑著臉說：〝你地要紙就自己去總務處申請啦，我D紙唔可以隨便比人架！〞我那一刻像被刀刺了一下！心中暗忖〝哎呀！BOSS跣我〞！但去到這地步，只好硬著頭皮，好客氣繼續說：〝吓！真係唔好意思啊！我唔清楚呀，係呀B先生叫我來這裡，我幫佢攞咋。〞佢就死死氣伸手去在櫃筒攞了2張〝咩野紙〞比我，一邊攞一邊仍口中唸唸有詞：〝個個都來問我攞2張，我自己唔駛用啦！………〞 我只好繼續臉懵懵一邊再講唔好意思呀，我會話比B先生聽架喇！一邊仲要講多兩句唔該添！

這件事之後我發覺，我BOSS很高興我回寫字樓工作，因為他可以叫我幫他打文件！原來他平時要打文件就要交去比打字房的打字員做！因為唔係得一個BOSS，所以文件都要排隊，但點排又要睇個文員的心情！那管你說〝趕〞！但事實係千萬別說〝趕〞這個字啊！因為對方還你一句〝個個都說趕，做得邊個先呀？〞所以，BOSS們都買她們的怕，不敢得罪她們！對著他們唯唯諾諾，不敢粗聲大氣。

所以後來我BOSS知我當天會回寫字樓工作的話，他就會叫我幫他打文件，我幾小時後就交給他，他開心得不得了，竟然說〝咁快打好嗱！〞我心諗，如果不是阿K用緊電腦，我一個鐘之前就已經可以比到你喇！

有時我甚至收到一些BOSS原本打算交比打字員打的文件，因為他不知我當天會回寫字樓，但見我回來了，就立即交了給我打！我沒所謂啊！我是按時鐘計糧的，所以有野做好過無野做，而且不管是打甚麼都是幫緊我BOSS做野，是工作之一，我唔會托佢手踭話〝呢D野應該係打字員做個喎！〞

所以對這事的感想係：唔怪得政府部門的工作效率咁差啦！

那些揸住雞毛的小角色，正式妹仔大過主人婆！今天我不知他們的工作效率有無改變，但當年那些老骨頭阿哥阿姐們，即使是最低級的也是不可得罪的！那時候的阿姐關起門來織冷衫，都無王管架！D老頂就隻眼開隻眼閉，但求風平浪靜等退休咬糧！

（聲明啊！我係講緊N年前的人事作風咋！與今天的人無關架！）


…………待續