（2008）094. 原來蚊子也未算可怕……無名腫毒

由香港帶來了菜種，一直不敢種出後院，因為有蟹、狗同蜥蜴，但咁遠帶到來，唔種又忍唔到手，於是就用盆種，可能這是快大菜心，還是天氣太熱，長不太高便已有花。他們還問我這是甚麼花！

結果有些開花有些又未夠高，等到都差不多高時才割下來吃，已開了花的讓牠繼續開，就當是盆栽花來種好了，反正黃色花仔也不錯。

黃昏外出淋花菜時，被一種這類蒼蠅咬了腳眼的地方，初時還是為只是蚊滋仔咬，因為蚊滋仔咬人一樣好痛又好痕。蚊滋仔本地人叫SANDFLY，好細好細隻，而這隻黃翼像蜜蜂又像蒼蠅的叫DOCTORFLY (唔知係咪咁串法呢)，如果唔講，可能你會說牠是小蜜蜂。

他們教我找出被咬到的咬口，用力把毒液擠出就沒事，但牠咬了我兩口，兩個突起的小山丘都找不到咬口，可能腫脹已把咬口逼埋了，結果我越擠就越覺痕，於是找來「均隆驅風油」，拚命向腫起的小丘擦，終於兩個小丘合併腫成一大片，整個腳眼都腫起來，還向腳趾方向擴散！如果唔講你知，你真係會以為我係比蜜蜂針到！

半邊腳原本佈滿血管的，忽然變得圓潤起來！這蒼蠅的毒真厲害！牠咬人時是不會感到痛的，到你感覺痛時牠的毒液已開始腐蝕你的皮肉，搽了驅風油不再痕但開始痛！痛的地方不在皮肉而是痛在骨子裡，例如牠只咬我腳眼下皮膚最薄的地方，但現在痛的地方卻是深入去腳眼骨附近。我心諗，若有幾隻同時咬一隻腳，真係分分鐘會幾日行唔到路o架！而家咁樣都會痕痛四至五日，今日都仲未消腫！

最慘係佢地防不勝防，又唔怕蚊怕水，所以我在屋兩個地方放定兩支殺蟲水，一見佢地只有向著牠噴才能消滅牠！

都唔知係咪本地人，尤其是黑人皮膚粗，佢地如果被蚊、sandfly 甚至doctorfly 咬到，只會用一種含薄荷成份的酒精搽下便算，對我來說，它跟水無分別！此外便甚麼膏藥也沒有，與印尼、馬來西亞、星架坡、越南等熱帶地方完全不同，她們有各種不同的膏藥、藥油等可以用來應付蚊釘蟲咬，無名腫毒，所以我每次返香港就會買白金油、驅風油、無比膏……等等各種止痕產品回來，用完就再叫屋企人寄過來！（真係居家旅行必備良藥，去熱帶地方不可少呀！）

這些火酒，都係留番佢地自己用啦！不過又不是完全無用的，因為有薄荷成份，搽完涼涼地都幾舒服，不過酒精一揮發掉皮膚乾了，就要再搽，連續搽幾次才會好些。